Біздің тәжірибе. Тұрақты даму саласындағы мақсаттарға қол жеткізу жөніндегі біздің жұмысымыз туралы хабардар болыңыз.

Қазақстанның азаматтық қоғам ұйымдары (АҚҰ) елдегі Тұрақты даму мақсаттарын (ТДМ) қалыптастыруға, іске асыруға және олардың орындалуын мониторингтеуге неғұрлым жүйелі әрі белсенді қатысуға шақырды. Бұл мәселе 2030 жылға дейінгі күн тәртібін іске асыру жөніндегі күш-жігер жеделдей түскен кезеңде ерекше өзектілікке ие.Бұл үндеу Қазақстан Республикасының Мәдениет және ақпарат министрлігі, Ұлттық экономика министрлігі, Экономикалық зерттеулер институты және Қазақстанның Азаматтық альянсы БҰҰ Тұрақты үйлестірушісі кеңсесінің қолдауымен ұйымдастырған дөңгелек үстел барысында айтылды. Іс-шараға азаматтық қоғам, мемлекеттік органдар және БҰҰ агенттіктерінің 70-тен астам өкілі қатысып, консультациялардан ТДМ-ға қатысты саясатты қалыптастыруға азаматтық қоғамның неғұрлым мазмұнды қатысуы мен ықпалын қамтамасыз етуге көшу жолдарын талқылады.Талқылаулар барысында азаматтық қоғамның ұлттық саясатты қоғамдастықтардың нақты жағдайы мен қажеттіліктерімен, әсіресе назардан тыс қалу қаупі бар топтардың қажеттіліктерімен байланыстырудағы маңызды рөлі атап өтілді. Қатысушылар сондай-ақ АҚҰ-ның белсенді қатысуы тұрақты даму басымдықтарын іске асырудағы ашықтық пен есептілікті арттыруға ықпал ететінін атап өтті. «Азаматтық қоғам ұйымдары біздің ашықтығымыз бен есептілігімізді арттыруға көмектеседі. Олар жұмысымыздың нәтижелерін мониторингтеу мен бағалауға қатысады, кері байланыс береді және қай бағыттарда жұмысымызды жақсарта алатынымызды көруге көмектеседі», – деді БҰҰ-ның Қазақстандағы Тұрақты үйлестірушісі Саранго Раднарагча.«Азаматтық қоғам БҰҰ-ның шешімдер қабылдау және консультациялар өткізу тетіктерінің де бір бөлігі болып табылады. БҰҰ-ның бірқатар агенттіктерінде азаматтық қоғамның консультативтік органдары жұмыс істейді, ал Қазақстандағы БҰҰ Елдік тобы Жастар консультативтік кеңесімен тығыз ынтымақтастық орнатқан. БҰҰ – денсаулық сақтау, білім беру және ауыл шаруашылығынан бастап қоршаған ортаны қорғау, гендерлік теңдік, адам құқықтары және қылмыстың алдын алуға дейінгі түрлі салаларда жұмыс істейтін агенттіктердің ауқымды жүйесі. Сондықтан біздің әріптестігіміз Қазақстанның түрлі салалары мен қоғамдастықтарын білдіретін ондаған азаматтық қоғам ұйымдарын қамтиды», – деп қосты ол.Қатысушылар ТДМ-ды үйлестіруге, іске асыруға және мониторингтеуге азаматтық қоғамның қатысуын күшейтуге бағытталған бірқатар ұсынымдар әзірледі. Негізгі ұсыныстар қатарында Қазақстанның ұлттық ТДМ архитектурасына АҚҰ-ның неғұрлым жүйелі қатысуын қамтамасыз ету, азаматтық қоғам ұйымдарының тұрақты ресурстарға қолжетімділігін жақсарту, деректердің сапасы мен қолжетімділігін арттыру, сондай-ақ азаматтық қоғам мен мемлекеттік органдар арасындағы диалогтың тиімді тетіктерін қалыптастыру бар. Ұсынымдарда осал топтардың қажеттіліктері мен қатысуына баса назар аудару, сондай-ақ азаматтық қоғам мен жеке сектор арасындағы ынтымақтастықты нығайту қажеттілігі де атап өтілді. Қатысушылар азаматтық қоғамның мазмұнды қатысуы жекелеген консультациялармен шектелмей, саясатты әзірлеу мен іске асырудың барлық кезеңдерінде өзінің сараптамалық білімін, деректерін және жергілікті қоғамдастықтар деңгейіндегі көзқарастарын ұсынуға мүмкіндік беруі тиіс екенін атап өтті.Дөңгелек үстел мемлекеттік органдар, азаматтық қоғам және БҰҰ жүйесі өкілдеріне практикалық тәжірибе алмасуға және ұлттық әрі жергілікті деңгейлерде ТДМ төңірегіндегі әріптестікті нығайтудың жолдарын айқындауға мүмкіндік берді.Талқылау қорытындысы бойынша әзірленген ұсынымдар Үкімет жанындағы ТДМ жөніндегі үйлестіру кеңесіне ұсынылып, Қазақстанның ТДМ-ға қол жеткізуді бағалау және мониторингтеу жөніндегі ұлттық есебінде көрініс табады. Бұл ұсынымдар Қазақстанның 2030 жылға дейінгі күн тәртібін іске асыру жолында ілгерілеуіне қарай саяси шешімдер, нақты деректер, қоғамдық қатысу және қоғамдастықтардың қажеттіліктері арасындағы байланысты нығайтуға ықпал етеді деп күтілуде.Қазақстандағы Біріккен Ұлттар Ұйымы инклюзивті қатысуды ілгерілету және елдің тұрақты даму жөніндегі күш-жігерінде түрлі топтардың пікірлері мен мүдделерінің ескерілуін қамтамасыз ету мақсатында Үкіметпен, азаматтық қоғаммен, жеке сектормен және басқа да әріптестермен ынтымақтастықты жалғастырады.