Бас хатшының Ғылымдағы әйелдер мен қыздардың халықаралық күніне арналған үндеуі

Ғылымдағы әйелдер мен қыздардың халықаралық күніне орай біз бір маңызды ақиқатты тағы да растаймыз: ғылым саласындағы теңдік – адамзаттың ілгерілеуі үшін шешуші мәнге ие.

Білім алуға қолжетімділікті кеңейту бағытында ілгерілеу болғанына қарамастан, ғылым, технология, инженерия және математика салаларында (STEM) жұмыс істейтін әйелдер әлі де ғылыми зерттеулерді қаржыландырудың жеткіліксіздігіне, гендерлік стереотиптерге және жұмыс орнындағы кемсітушілік тәжірибелерге тап болып келеді. Әлем бойынша әйел ғалымдар барлық ғалымдардың тек үштен бірін ғана құрайды.

Бұл алшақтық әсіресе технология саласында айқын байқалады: әйелдер деректер мен жасанды интеллект саласындағы мамандардың небәрі 26 пайызын, ал бұлтты есептеулер саласындағы мамандардың бар болғаны 12 пайызын құрайды. Әйелдердің, әсіресе басшылық лауазымдардағы әйелдердің жеткіліксіз өкілдігі цифрлық құралдарда біржақтылықтың пайда болуына әкеліп, нақты зиян келтіруде.

Әйелдердің ғылымнан шет қалуы біздің климаттың өзгеруіне қарсы күрес, халық денсаулығын қорғау және ғарыштағы қауіпсіздікті қамтамасыз ету сияқты шұғыл жаһандық сын-қатерлерді бірлесе шешу қабілетімізді әлсіретеді. Бұл мәселелерді шешу үшін әрбір қыздың өзін ғылым, технология, инженерия және математика салаларында болашақ маман ретінде елестете алуын, ал әрбір әйелдің ғылыми мансабын табысты дамыта алуын қамтамасыз етуіміз қажет.

Сондықтан Біріккен Ұлттар Ұйымы ғылым, технология, инженерия және математика салаларын таңдаған әйелдер мен қыздарды әртүрлі пәндер бойынша шәкіртақылар, тағылымдамалар және тәлімгерлік бағдарламалар арқылы қолдап келеді.

Жаңартылатын энергия көздерін пайдалануды ілгерілетуден бастап, келесі пандемияның алдын алуға дейінгі болашағымыз адам әлеуетін барынша толық іске асыруға байланысты. Бүгін және әр күні әйелдер мен қыздардың ғылым саласындағы биік мақсаттарына жетуіне мүмкіндік беріп, олардың құқықтарын қорғау және баршаға ортақ игілік үшін талпынайық.